Binne sy kerk roep God sekere mense tot besondere diens. Dit is die diens van regering (ouderlinge), die diens van Woordverkondiging (predikant), en die diens van liefde (diakens). So is Jesaja geroep tot die besondere diens van profeet. Paulus is geroep tot die besondere diens van apostel. Christus is geroep tot die heerlike maar moeilike diens van verlossing.

In Jesaja 49 word die taak en roeping van Christus in Ou Testamentiese terme uitgedruk. Sy taak is moeilike (1983-Vertaling) maar tog heerlik (1953-Vertaling). God, die Vader, is sy krag. Hy roep tot die moeilike/heerlike taak. Hy gee die krag om die werk te verrig. Net so staan God ons deur sy Gees by om ons moeilike/heerlike roepingswerk te verrig.

Geliefde Gemeente

In die prediking het ons die laaste tyd baie gehoor oor roeping. Ons het gehoor dat dit natuurlik vir die mens is om ver van God te lewe. Tog, God wil ons in sy diens gebruik. En om ons in sy diens te gebruik, roep Hy ons.

Gedurende Meimaand was daar ‘n hele reeks preke oor die roeping van Abraham.

• Abraham wat op 75 jarige leeftyd uit sy vaderland moes wegtrek na die land waarheen die Here hom geroep het.
• Abraham wat geroep was om die Here voluit te gehoorsaam te midde van ‘n wêreld wat God nie geken het nie.
• Abraham wat gehoorsaam sy roeping uitgeleef en daarom die seën van die Here beleef het. Die Here het ook belowe dat al die nasies van die aarde in Abraham geseën sou wees.

Verlede Sondag het ons na nog ‘n preek oor roeping geluister. Ons het gehoor wat die implikasie daarvan is wanneer ons aan die roeping van die Here ongehoorsaam is soos Simson daaraan ongehoorsaam was.

• Simson is deur die Here geroep om sy volk van die oorheersing van die Filistyne te bevry.
• Simson was egter aan sy roeping ongehoorsaam. Hy was ongeërg teenoor sy roeping. En die Here het hom verlaat.

Gemeente,

Lees ons deur die hele Bybel, dan tref dit ons dat elke gelowige op een of ander stadium besonderlik roeping van God in een of ander taak ontvang het:

Abraham is geroep, Moses is geroep, Samuel is geroep, Simson is geroep, Jesaja is geroep, Petrus, Paulus, ja, elke gelowige is deur God op sy naam geroep om ‘n taak vir die Here te verrig.

En net so het die Here elkeen van ons geroep. Hy het ons nog voor ons geboorte op ons name geroep om in sy diens te staan.

Ons teks is vanoggend Jesaja 49. Die taak waarvoor Jesaja geroep was (so lees ons in Jesaja 6) was om die Woord van God aan die volk bekend te maak. Jesaja moes profeet van die Here vir sy volk wees.

Die boek Jesaja word in twee groot dele verdeel.

• In die eerste 39 hoofstukke het Jesaja geprofeteer oor die komende ballingskap van die volk. Die volk moes hoor dat omdat sy as volk ongehoorsaam aan haar roeping was, die Here haar in ballingskap sou laat wegvoer.
• Die tweede deel van die boek Jesaja (hoofstukke 40 tot 66 – die gedeelte waaruit ons vanoggend gelees het) is gerig op die volk wat dan ook in ballingskap gegaan het. Hierdie gedeelte moes die volk in ballingskap troos met die wete dat die Here hulle op sy tyd vanuit die ballingskap sou verlos.

Vanaf hoofstuk 40 tot 55 is daar vier gedeeltes wat deur spesialis navorsers van die boek Jesaja die "knegliedere" genoem word. Hierdie is vier gedeeltes wat handel oor ‘n besondere dienaar/kneg van die Here - daardie persoon wat die volk sou verlos.

Eintlik handel hierdie vier liedere nie oor daardie persoon nie. Dit is liedere waarin daardie dienaar sélf aan die woord is en oor sy dienswerk praat.

Broers en Susters, die gedeelte uit Jesaja wat ons vanoggend saamgelees het, is die tweede van hierdie vier dienaarliedere. Alhoewel Jesaja aanduidings oor hierdie dienaar gee, is daar effense onduidelikheid oor wie hierdie persoon werklik was wat die volk uit ballingskap sou verlos.

En dit is met ‘n rede, want alhoewel hierdie persoon die volk uit ballingskap sou verlos, het die Heilige Gees deur Jesaja eintlik iets veel diepers met hierdie dienaarliedere bedoel. Ek gaan vir ons enkele verse uit die derde en vierde liedere voorlees. Luister bietjie of jy kan hoor wie hierdie besondere Dienaar van die Here sou wees – hy wat self hier aan die woord is.

Eers lees ek vir ons vanuit Jesaja 50 vanaf vers 5: Die Here my God het my geleer om te luister: ek was nie teen Hom opstandig nie, ek was nie ontrou aan Hom nie. ⁶Ek het my rug gehou vir dié wat my slaan, my wang vir dié wat my baard uittrek. Ek het my gesig nie weggedraai toe ek bespot en bespoeg is nie.

Ek lees ook vir ons saam vanuit Jesaja 53 vanaf vers 6: ⁴Tog het hy óns lyding op hom geneem, óns siektes het hy gedra. Maar ons het hom beskou as een wat gestraf word, wat deur God geslaan en gepynig word. ⁵Oor ons oortredings is hy deurboor, oor óns sondes is hy verbrysel; die straf wat vir ons vrede moes bring, was op hom, deur sý wonde het daar vir ons genesing gekom.

Herken jy hierdie besondere Dienaar van die Here? Veel dieper as bloot op die verlosser vanuit ballingskap in Babelonië aan te dui, word die verlosser vanuit die ballingskap van die sonde aangedui. Ja, eintlik is hierdie besondere Dienaar van die Here wat in hierdie tekste aan die woord is, Hy wat vir ons sondes deurboor is, ons Here Jesus Christus self. Reeds hierdie in die Ou Testament praat Hy oor die taak waarvoor sy Vader Hom geroep het.

Geliefdes,

God het my en jou geroep. Ja, net soos daar in Jesaja 49:1 staan, het die Here ons al voor ons geboorte geroep. Hy het ons geroep en aan ons ‘n taak gegee.

Christus se taak, waarvoor Hy bestem is lank voor Hy mens geword het uit Maria, was om volgens Jesaja 49:7 redding vir die volke tot in die uithoeke van die aarde te bewerk en vir hulle ‘n lig te wees.

Broer en Suster, my en jou taak (waarvoor God ons geroep het nog voor ons gebore is) is om hierdie reddingslig van God deur ons gehoorsaamheid aan Hom, tot in die uithoeke van die aarde te laat skyn. So leer die Here ons in die Nuwe Testament.

Hierdie taak kan ons nie op ons eie verrig nie. Daarom dat die Here ons as ‘n gemeente, ‘n kerk, bymekaar gevoeg het.

• Ons moet mekaar bystaan.
• Ons moet mekaar help, sodat elkeen van ons ons roeping van God kan uitleef.

Om dit vir ons moontlik te maak om as sy kerk te funksioneer, roep die Here sekere lidmate tot besondere diens.

• In die Ou Testament is Simson bv. besonderlik geroep as rigter en Jesaja is besonderlik geroep as profeet.
• Christus is besonderlik geroep tot Verlosser.
• In die Nuwe Testament is Paulus en Petrus besonderlik geroep tot apostels.

Vandag het ons in die kerk besondere dienste of ampte. Dit is mense wat besonderlike deur die Here tot besondere dienswerk geroep is.

• Daar is die lidmate wat geroep word tot predikante. Hulle hooftaak is om die Woord van die Here uit te lê en te verkondig.
• Daar is die lidmate wat geroep word tot ouderlinge. Hulle hooftaak is om die gemeente vir Christus te regeer en te sorg dat alles reg en ordelik verloop.
• En daar is lidmate wat geroep word tot diakens. Hulle hooftaak is om te sorg dat die Christelike liefde in en deur die gemeente bedien word.

Gemeente, vanoggend word hier vier nuwe diakens in ons gemeente in hulle besondere dienswerk bevestig. Nadat hulle wettig deur die gemeente verkies is, het hierdie vier lidmate tot die oortuiging gekom dat die Here hulle deur die gemeente geroep het om in hierdie besondere diens te staan. Daarom het hulle die roeping opgevolg en sal hulle vanoggend in hulle diens bevestig word.

Geliefde,

• óf jy nou in ‘n besondere roepingsdiens staan,
• én of jy nou net in die roepingsdiens van gelowige kind van God staan

– God het ‘n taak vir jou.

Bepaal wat jou taak is en leef jou roeping voor God uit. Onthou, jy sal verantwoording aan Hom moet doen oor hoe jy jou roeping uitgeleef het!

Soms is ons roepingswerk vir ons bitter moeilik. Vir Christus was sy roepingswerk ook bitter moeilik.

• Dink maar hoe Hy in Getsemané bloed gesweet het.
• Dink aan die hou met die sweep, die doringkroon, die kruisiging.

Sy roepingswerk was egter bitter belangrik.

In Jesaja 49:5 vertel Jesus al in die Ou Testament van die belangrikheid van die taak wat Hy sou kom verrig. Hy sê: Die Here het my ‘n belangrike opdrag gegee. Maar hoor wat sê Hy volgende: en my God gee my die krag om dit te doen!

Geliefdes, die take waartoe die Here ons roep, is nie altyd maklik nie. Soms is dit bitter moeilik. Soms vra Hy ons om in die uitleef van ons roeping vir Hom te sterf! Tog, wanneer Hy ons roep, dan gee Hy ons ook die krag om ons roepingswerk te verrig.

• So getuig Jesus al in die Ou Testament in Jesaja 49.
• En so getuig Paulus ook in die Nuwe Testament wanneer Hy in Filippense 4:13 sê: Ek is tot alles in staat deur Christus wat my krag gee!

Iets interessants kom na vore wanneer ons na die woordjies "sterkte" of "krag" kyk, wat gebruik word om die bystand van die Here in ons roepingswerk uit te druk.

Baie van julle sal miskien weet wat die naam van die ligte masjiengeweer is wat die Israelse weermag vandag gebruik. Die naam van hierdie masjiengeweer is die "Uzi". "Uzi" is ‘n Hebreeuse naam wat beteken "my sterkte".

Nou, die besondere Dienaar van die Here (Jesus) wat in Jesaja 49:5 aan die woord is, sê letterlik in die oorspronklike Hebreeus: God is my Uzi. God is my sterkte… …

Wanneer Paulus in Filippense 4:13 sê dat Hy tot alles in staat is deur Christus wat Hom krag gee, dan skryf hy in Grieks. Die Griekse woordjie vir krag wat hy gebruik, is "dinamo". Volgens Paulus is Christus sy "dinamo".

Meeste van julle ken die Afrikaanse woordjie dinamo. Die Afrikaanse woordjie is verwant aan die Griekse woord. ‘n Dinamo ‘n ‘n kragopwekker.

Daar is nog ‘n Afrikaanse woord wat verwant is aan die Griekse woord dinamo. Dit is die woord dinamiet. Dinamiet is kragtige plofstof.

Gemeente, wat leer ons uit hierdie woordspeling? Ons leer dat wanneer ons ons roeping uitleef, ons op God se bystand kan vertrou.

• Hy is ons sterkte.
• Hy gee ons krag.
• Ons weet dat Hy deur sy Gees binne ons bly.
• Hy wek die krag vir ons roeping binne ons op.
• Hy maak dit vir ons moontlik om kragtig diensbaar aan Hom te wees in die uitleef van ons roeping.

Soms is ons roeping vir ons bitter moeilik. Soms word ons geroep tot ‘n taak en ons sien nie daarvoor kans nie. Soms lê daar ‘n roepingstaak voor ons en ons weet nie hoe ons dit gaan verrig nie. Onthou dan:

• God is ons sterkte.
• God is ons krag.
• Ons is tot alles in staat deur Christus wat ons krag gee.
• Hierdie belofte is waar, want deur sy Gees bly Hy binne in ons.

Gelowige, leef jou roeping in God se krag uit. Jy kan, want Hy maak dit vir jou moontlik!

AMEN

12/07/03 23:30:54