Word fiks in gehoorsaamheid aan die Here

1 Timoteus 4:6-16 (Kern 1 Tim 4:7b en 12b)

LITURGIE BY DIE OGGENDDIENS ONTMOETINGSDIENS Votum en groetseën Lofsang: Ps 90:1,9 Geloofsbelydenis VEROOTMOEDIGING- EN VERSOENINGSDIENS Wet: Ps. 119:7,11 WOORDDIENS Gebed Sb 43:4,5 Skriflesing en prediking ANTWOORDDIENS Gebed Liefdegawe: Lofsang: Ps 18:14,15,20 Wegstuurseën.

 

Skets

Oefening in gehoorsaamheid aan God

Die woordjie "oefen" in ons teks is die vertaling van ‘n Griekse woord wat ons ook nog op ‘n ander manier in Afrikaans gebruik word. Dit is die woordjie "gimnasium". ‘n Gimnasium is ‘n plek waar ‘n mens oefen. Net soos jy jou liggaam moet fiks hou deur te oefen, moet fiks word in jou navolging van God. Dit kan jy alleen deur geloofsoefening regkry.

Hoe om in gehoorsaamheid aan God te oefen

Om te oefen vereis dissipline. Ons oefen om in gehoorsaamheid aan God te leef deur die volgende dissipline in ons lewe toe te pas: Deur daarop te fokus om ‘n gelowige voorbeeld te wees in woord, daad, liefde, geloof en reinheid (kyk hier na die sinnetjie in die Verklarende Bybel).

 

 

Preek

Geliefdes in ons Here Jesus Christus

Om ‘n marathon goed te kan hardloop, moet ‘n mens fiks wees.

• Jy moet ure en ure oefen.
• Jy moet baie kilometers hardloop.
• Wanneer ander mense slaap, óf ontspan, moet jy oefen om fiks te word vir die wedloop.
• Jy kan nie net eet wat jy wil nie. Jy moet die regte dieet volg, sodat jou liggaam die nodige energie en voedingstowwe kan inneem wat sal maak dat jy juis hierdie strawwe oefenprogram sal kan voltooi.

Ja, om fiks te word verg dissipline!

Min van ons wat vanoggend hier is, is langafstandatlete. Maar, Broer en Suster, elkeen van ons wat vanoggend hier is, is self ook besig om ‘n wedloop te hardloop. Ons is besig om die wedloop van die geloof te hardloop. Roep maar gerus die woorde van Hebreërs 12:1-2 in jou gedagtes op: Terwyl ons dan so ‘n groot skare geloofsgetuies rondom ons het, laat ons elke las van ons afgooi, ook die sonde wat ons so maklik verstrik, en laat ons die wedloop wat vir ons voorlê, met volharding hardloop, die oog gevestig op Jesus, die Begin en Voleinder van die geloof.

Elkeen van ons is besig om hierdie wedloop te hardloop. En om hierdie wedloop suksesvol en goed te kan hardloop, moet ons fiks wees. Daarom dat Paulus in ons teks (1 Tim 4:7) skryf: Oefen jou liewer om in toewyding an God te lewe.

Hoor jy die sinsnede wat wys op die voorbereiding vir hierdie geloofswedloop? Dit is die woorde

Oefen jou om in toewyding aan God te lewe

Geliefdes, om die wedloop van die geloof te hardloop is nie vanselfsprekend nie.

• Om ‘n aardse wedloop te kan hardloop, moet jy gereed en voorbereid daarop wees.
• Om die wedloop van die geloof te kan hardloop, verg dieselfde tipe gereedheid en voorbereiding.

Ons moet oefen om hierdie wedloop te kan hardloop.

Anders gesê, om in gehoorsaamheid aan die Here te kan leef, om te kan leef soos ‘n kind van God, verg oefening en voorbereiding.

Die woordjie "oefen" in ons teks, is die vertaling van die Griekse woord wat ons ook nog op ‘n ander manier in Afrikaans gebruik. Dit is die woordjie "gimnasium".

Nou, ‘n gimnasium is ‘n plek waar ‘n mens oefen om fiks te word. Ons praat so maklik in ons taal van elke dag en sê: "Ek gaan gim." Daarmee bedoel jy: "Ek gaan oefen." Op ‘n letterlike manier vertaal, sê Paulus in ons teks: "Gim jou liewer om in toewyding aan God te lewe."

Broers en Susters, is dit nie tyd dat ons nou ‘n belydenis en erkenning moet maak nie:

• Hoe baie van ons is regtig daarvan bewus dat om gelowig gehoorsaam aan God te lewe, oefening verg?
• Wie van ons konsentreer doelbewus daarop om te oefen om in toewyding aan God te lewe?

Ek is daarvan oortuig dat meeste van ons reken dat om ‘n toewyding aan God te lewe ‘n vanselfsprekende saak is. Ons dink dalk soos volg oor die saak: Ons dink dat ons kinders van God is, en daarom leef ons nou vanself in gehoorsaamheid aan Hom.

Watter openbaring gee die Here dan nie vanoggend aan ons nie! Nee, om gehoorsaam in toewyding aan Hom te lewe, is nie ‘n vanselfsprekende saak nie. Ons moet oefen om die Here reg te dien!

Om fiks te word vir ‘n wedloop, m.a.w. om doeltreffend te oefen vir ‘n gewone marathon, so het ons in die begin gesê, stel sekere eise aan ‘n mens.

• Jy moet anders doen as wat jy van nature ingestel is om te doen.
• Jy moet jou inspan.
• Jy moet jou vermoei.
• Jy moet selfs geld spandeer op die nodige oefentoerusting.
• Jy moet ‘n geskikte oefenprogram hê.

Het jy al daaraan gedink dat om die wedloop van die geloof te hardloop, hierdie eise baie dieselfde is:

• Jy moet anders doen as wat jy van nature ingestel is.
• Jy moet jou inspan.
• Jy moet jou vermoei.
• Jy moet selfs geld spandeer om die beste oefentoerusting moontlik te kan aanskaf.
• Jy moet ‘n geskikte oefenprogram hê

Gemeente, voordat julle sê die dominee praat in sirkels, kom ek noem hierdie dinge by die naam:

• In die eerste plek, jy moet dinge anders doen as wat jy van nature ingestel is.
• Van nature wil ons ontspan.
• Van nature sal ons dalk eerder op ‘n Sondagoggend en aand by die huis wil wees as om kerk toe te kom.
• Van nature sal ons eerder heeltyd televisie kyk as om huisgodsdiens te hou.
• Van nature sal ek my eerder ophou met iets anders as om Bybel te lees en met God in gebed te praat.

• In die tweede plek, jy moet jou inspan en vermoei in jou oefening.
• Soms lees jy iets in die Bybel wat jy nie verstaan nie. Worstel en sukkel jy daarmee totdat jy ‘n antwoord kry? Hoe maklik gee ons nie op nie.
• Soms is jy bitter vaak en moeg. Doen jy moeite om dan nog stil te raak voor die Here in Skrifstudie
• Soms is jou dagprogram so vol. Span jy jou in, vermoei jy jouself om ook nog tyd te maak vir God en sy kerk?

• In die derde plek, jy moet geld spandeer om die beste oefentoerusting moontlik aan te skaf.
• Het jy, en elke lid van jou gesin ‘n Bybel? Het julle miskien iets soos ‘n Verklarende Bybel wat jou kan help om die Bybel beter te verstaan.
• Doen jy moeite, spandeer jy geld om te kan groei in jou geloof?

• In die vierde plek, jy moet ‘n geskikte oefenprogram hê.
• Elke atleet wat vir ‘n wedloop oefen, het ‘n plan, ‘n program waarvolgens gewerk word. Het jy ‘n doelbewuste plan en program waarvolgens jy oefen in jou geloofslewe?
• Watter plek neem persoonlike stiltetyd, huisgodsdiens, groepsbybelstudie, eredienste en ander toerustings-geleenthede in jou program in?

Gemeente, ja, om te oefen om in toewyding aan God te lewe, verg inspanning. Kom ons kyk nou vervolgens na

waarna ons moet oplet om in gehoorsaamheid aan God te kan oefen.

Anders gesê,

• wanneer ons onsself inspan en vermoei,
• wanneer ons ‘n plan en program het waarvolgens ons oefen om in toewyding aan God te lewe,

watter oefeninge moet ons in hierdie plan en program doen om fiks te kan word?

Op hierdie oefeninge wat ons moet doen, kry ons ‘n entjie verder in 1 Timoteus 4 lig. In vers 12 staan daar: maar wees jy vir die gelowiges ‘n voorbeeld in woord en gedrag, in liefde, geloof en reinheid.

Lees ons hierdie teks in die oorspronklike taal, kom daar ‘n klem na vore wat nie presies in ons Afrikaanse vertalings weergegee is nie. ‘n Goeie vertaling van hierdie teks sal ook wees: maar wees jy ‘n voorbeeld van gelowiges in woord, gedrag, liefde, geloof en reinheid.

Het jy die verskil in klem gehoor? Deur te oefen om in gehoorsaamheid aan God te lewe, moet jy nie net vir ander gelowiges ‘n voorbeeld wees nie, jy moet vir alle mense (gelowig en ongelowig) ‘n voorbeeld wees van hoe ‘n gelowige, ‘n kind van God, behoort te lewe.

Ja, hiermee kom ‘n opdrag tot ons: In die wyse waarop ons lewe moet ons ‘n beeld van ‘n ware gelowige (‘n beeld van Christus) wees.

Eerstens, ons moet beeld van Christus wees in die wyse waarop ons praat

Ons moet oefen om met ons woorde God te verheerlik. Ons moet oefen om met ons woorde die evangelie van Christus uit te dra.

Geliefde,

• konsentreer jy daagliks bewustelik daarop om (nie net tydens godsdiensoefening nie) maar in jou daaglikse handel en wandel, met jou woorde jou toewyding aan God te toon en uit te leef?
• Plaas jy ‘n wag voor jou mond?
• Kan jy ander met jou mond bemoedig omdat jy in God se Woord geoefen is?

Tweedens, ons moet ook beeld van Christus wees in die wyse waarop ons ons gedra

Gemeente, hoe groot is die aanklag van sekere heidene nie teen die Chistendom nie. Mahatma Ghandi, daardie groot leier in Indië, het klaarblyklik oor die Christendom gesê: Die boodskap van die Chistelike evangelie is wonderlik. Dit kan egter nie waar wees nie, want die Christene leef dit nie uit nie!

Ons moet lewe, ons moet werk, ons moet optree soos God van ons vra. Nie net by die kerk nie, maar ook by die werk, by die huis, tussen vriende.

• Konsentreer daarop om te oefen om te lewe volgens die voorskrifte van God.
• Wees voorbereid oor hoe om soos ‘n gelowige op te tree in sekere situasies wat jy weet vir jou kan opduik.
• As jy bv. weet jy gaan kwaad word as iets gebeur, berei jou voor en oefen om nie kwaad te word nie – so is jy ‘n voorbeeld van ‘n ware gelowige.

Derdens, as beeld van ‘n ware gelowige moet ons verder oefen om in liefde, geloof en reinheid te lewe

Geliefde, om in Christelike liefde, om in geloof en om in reinheid te lewe, verg oefening.

• Van nature wil ons mekaar haat (kyk maar net hoe maklik haat oor rassegrense heen ontspring).
• Van nature leef ons in ongeloof – ons wil God nie vertrou nie en maak gedurigdeur ons eie planne.
• Van nature wil ons in ongehoorsaamheid aan God lewe en daardeur in onreinheid verval.

Die enigste manier om in liefde, geloof en reinheid te lewe is om liefde, geloof en reinheid in te oefen:

• Om in liefde te lewe, is om Christus se selfopofferende gee van Homself vir ons, self toe te pas. Dit is om onsself minder te maak, en ons naaste meer.
• Om in geloof te lewe, is om te oefen om God die beheer van ons lewens te gee. Dit is om te oefen om God se plan vir ons lewens raak te sien en daarby in te val en daarin mee te werk.
• Om in reinheid te lewe, is om te oefen om onreinheid raak te sien en daarvan weg te bly.

Aanmoediging

Broer, Suster, Mede-gelowige, sien jy hoekom dit noodsaaklik is om te oefen om in toewyding aan God te lewe? Vanweë ons sondige geaardheid is ons onfiks in toewyding aan God. Ons is onfiks, ons moet oefen.

Stel vir jouself ‘n oefenprogram op om kennis van toewyding aan God op te doen. Gebruik hiervoor die volgende gimnasium apparate:

• jou Bybel;
• hulpmiddels soos verklarings by die Bybel;
• gebed;
• huisgodsdiens;
• groepsbybelstudie;
• katkisasie;
• eredienste!

En gaan oefen dan

• in jou woorde,
• in jou dade,
• en in jou liefde, geloof en gehoorsaamheid aan God,

om ‘n voorbeeld te wees van hoe ‘n gelowige moet optree.

So sal jy met sukses die wedloop van die geloof hardloop, want hierdie oefening het volgens 1 Tim 4:8 groot waarde, want dit bevat ‘n belofte van lewe, vir nou en vir die toekoms.

Ja, deur vir die wedloop van die geloof te oefen, sal jy vir elke hindernis op die baan gereed wees en sal jy gelowig enduit volhou en die wenstreep bereik. En agter die wenstreep wag die oorwinnaarskroon vir jou, die lewe by God.

Geliefde, hoor wat sê Paulus hoor aan Timoteus: Hierdie is ‘n betroubare woord en kan sonder voorbehoud aanvaar word. Hierdie ís ‘n betroubare woord en kán sonder voorbehoud aanvaar word!

AMEN

 

 

 

25/07/03 15:45:58